Wanneer iemand jou 'n guns bewys, doen dieselfde vir hulle.
- Essop (620 - 564 V. C.)
'n Mier was eendag by die rivier om water te drink. Ongelukkig het die mier op 'n manier in die rivier beland en is hy met die stroom meegesleur.
Die miertjie het gehyg, gespartel, op stokkies en takkies probeer klim, maar was hopeloos te lig en klein.
'n Bosduif het op 'n tak in 'n boom langs die rivier gesit en koer. Die duif het die mier in die rivier gesien spartel, 'n blaar van die boom afgepik, en dit in die rivier naby die mier laat val. Die mier het bo-op die blaar geklim en kon veilig die oewer haal.
'n Rukkie later het 'n voëljagter daar aangekom. Hy het onder dieselfde boom gaan staan en die bosduif op die tak gesien sit. Stilletjies en versigtig het hy 'n kettie (rekker) uit sy sak gehaal om die duif te skiet. Die mier kon sien wat die voëljagter wil doen.
Toe die voëljagter afbuk om 'n klip op te tel, het die mier hom tussen sy tone gebyt. Die voëljagter het met sy voete op die grond gestamp om die mier af te skud.
Danksy die mier het die bosduif die voëljagter onder die boom gesien en weggevlieg.
Fluit, fluit, die storie is uit.
***
Hierdie verhaal word toegeskryf aan Essop (Aesop / Aesopus), 'n beroemde slaaf wat tussen 620 - 564 voor Christus (V. C.) in antieke Griekeland gewoon het. Dit is maar slegs een van die honderde verhale wat vandag sy naam dra.
'n Groot aantal verhale wat aan Essop toegeskryf word, behels motiewe en simbole vreemd aan die Griekse kultuur, geloof, en leefstyl van Essop se tyd, en die vermoede is daarom sterk dat baie van hulle oorspronklik in die mondelingse tradisie van ander kulture ontstaan het en toe summier onder Essop se naam oorvertel is. Alhoewel betroubare inligting oor hom nou baie skaars is, het die slaaf, Essop, daarin gespesialiseer om doodgewone verskynsels en voorvalle te gebruik om boeiende en treffende verhale te vertel.
Appolonius van Tiana, 'n filosoof in die eerste eeu N.C., het die volgende geskryf oor Essop: ''...nes iemand wat 'n eenvoudige bordkos met smaak geniet, gebruik hy die nederigste voorbeelde om groot waarhede te openbaar, en nadat hy die storie smaaklik opgedis het, het hy goeie advies bygevoeg oor wat om te doen en nie te doen nie. Ook was hy vreeslik lief vir die waarheid; veel meer as enigeen van die digters...''
Alhoewel Essop se verhale vandag hoofsaaklik aan kinders deur middel van storieboeke oorgedra word, is hulle oorspronklik geskep en bedoel vir volwassenes.
Opmerkings
Plaas 'n opmerking