'n Haan sit eendag hoog in 'n boom.
Onder staan 'n honger jakkals wat hom wil vang en opeet.
''Haan, kom af, ek het goeie nuus vir jou!'' sê Jakkals.
''Watse nuus?'' vra die haan.
''Etsê, het jy nie gehoor nie? Alle voëls en diere het vrede gemaak. Van nou af is ons almal vriende en ons gaan saam lewe soos broers. Kom af sodat ek jou kan gelukwens,'' sê Jakkals.
Die haan sê niks. Hy sit en rek net sy nek soos hy kyk na iets in die verte.
''Wat sien jy?'' vra die jakkals.
''Ek dink dit is die plaasboer se honde.''
Toe word Jakkals haastig om weg te kom.
''Nee, wag!'' sê die haan. ''Hoekom is jy dan nou so haastig? Ons is mos nou almal vriende.''
''Nee, nee, miskien het die plaasboer se honde nog nie die nuus gehoor nie!'' sê Jakkals en hy is blitsvinnig daar weg.
''O, so! Nou verstaan ek!'' skree die haan agter hom aan, maar Jakkals is lankal weg.
Fluit-fluit, die storie is uit.
***
Die Kleuterstorieboek is oorspronklik in 1966 saamgestel deur Elizabeth van der Merwe en Anna du Raan. Hierdie verhaal is op die oorspronklike weergawe gebaseer. Die foto is geneem deur Philip Pikart vir birdlife.org.
Opmerkings
Plaas 'n opmerking