Inheemse Namibiese kunstenaar, Michelle Isaak se talent is tasbaar en opvallend. Haar abstrakte, drie-dimensionele werke het vorm, tekstuur, trek die oog op verskillende vlakke, is noukeurig uitgevoer, en terg die sintuie met treffende kleure. Sy het die kunssinnige vermoë om 'n eenvoudige karton (boks) in 'n asemrowende kunswerk te omskep.
Michelle is ook 'n lid van NJE Collective, 'n plaaslike kunsvereniging gebaseer in Namibië vir kunstenaars in suider Afrika wat mentorskap, ondersteuning en hulpbronne aan kunstenaars verskaf en met hulle deel.
In Februarie vanjaar was sy een van ses (6) plaaslike kunstenaars wat hul werke by die Cape Town Art Fair tentoongestel het, waar een van haar kunswerke 'n aanhanger en nuwe tuiste in New York, die V. S. A., gevind het.
Sy is altyd besig met iets interressant op Instagram, maar wie is Michelle Isaak? Ons het haar vir 'n onderhoud benader om kennis te maak.
1. Waar kom jy vandaan en hoe beïnvloed dit jou werk?
Ek is gebore en getoë in Windhoek, Namibië, met my ses (6) sibbe. Elkeen van ons is prakties aangelê met 'n passie vir elkeen se verkose veld. Ek het, byvoorbeeld, altyd met 'n ink pen op my vel geteken min wetend dat dit na 'n loopbaanverandering sou lei.
2. Hoe het jou kuns ontstaan en hoe het jy jou vaardighede ontwikkel?
Die dag dat ek besef het om te kan teken is nie net 'n lekker stokperdjie nie was ek in graad tien (10), dit was die Life Sciences klas, en ek het deur 'n tydskrif geblaai. Ek het 'n tekening van kitaar gesien en myself uitgedaag om 'n kitaar presies soos die een in die tydskrif te teken, en tot my verbasing het dit ongelooflik gelyk. Van my klasmaats wat my dopgehou het was net so verbaas en het gedink ek het die tekening nagetrek.
Daarna het ek daagliks geteken tot in 2015 toe ek met deeltydse kunsklasse by die College of the Arts (COTA) begin. Ek het my diploma in visuele kunste in 2019 voltooi.
3. Wie, of wat, was of is die grootste invloed op jou werk?
Toe ek grootgeword het, was ek nie uitgesproke nie. Ek was altyd op my eie, het altyd geïsoleer, besig met my eie dinge. Kuns het vir my ontvlugting gebied van die wêreld om my. By COTA het ek geleer hoe om kuns as terapie te gebruik waardeur ek my antisosiale gevoelens, swakhede en vrese kan aanspreek. Ek word inspireer deur my ervaringe of iemand anders se verhaal waarmee ek kan vereenselwig. Ek vind dan 'n manier om dit wat my inspireer in beelde om te sit en 'n storie te vertel met afval en herwonne materiaal.
4. Wat is jou gunsteling medium om mee te werk en hoekom?
Dis baie opwindend om met afval en herwonne materiale te werk soos ou koerante, bokse (kartonne), plastiek, lap, ensovoorts. Ek gebruik herwonne materiaal omdat dit maklik is om mee te werk want hulle bestaan reeds in verskillende teksture, lyne, vlakke en vorme, hulle beteken ook iets vir ons, mense, wat hulle gebruik het, hulle het altyd iets oor hulself te sê, en, natuurlik, omdat hulle maklik verkrygbaar is. As 'n Namibiese kunstenaar gebruik ek wat ek om my het. Namibië het nie baie hulpbronne vir kunsmateriaal nie en dit kan baie duur wees. Ek maak gebruik van dit wat ek rondom my vind. Covid-19 het ons baie geleer!
5. Hoe sal jy jouself en jou kuns beskryf?
Ek sou myself beskryf as 'n kind van God, gretig om andere te help, of dit nou met my talent of emosionele ondersteuning is. My kuns praat wanneer woorde nie kan verduidelik nie. Deur my kuns as terapie te gebruik het my laat besef dat ek nie net myself nie maar soveel andere ook help wat dieselfde probleme het wat ek eens gehad het. Dit help om dinge vanuit 'n ander perspektief te sien of hulle vanuit 'n ander hoek te benader.
6. Waar vind jy inspirasie vir jou werk en wat motiveer jou om kuns te skep?
Die meeste mense sien rommel as vullis. Ek sien skatte. Die herwonne materiaal wat ek versamel het betekenis en skoonheid en vertel soveel stories waarvan ons almal deel is. Herwonne materiaal maak my opgewonde, ek raak sommer dadelik kreatief.
7. Wanneer is jou gunsteling tyd van die dag om te werk?
Ek is op my kreatiefste laat in die aand, na 22:00, en vroeg in die oggend, na 03:00. Die beste tyd vir my om kreatief te wees is wanneer almal slaap.
8. Waarom is kuns belangrik?
Kuns is 'n belangrike deel van ons wêreld. As ons vir 'n paar sekondes rondom ons kyk, sal ons kuns oral sien. Dis in motors, huise, klere, sakke, in die voorbereiding van kos, in glase, bekers, koppies, borde, skoene, ons vind kleure, ontwerpe, betekenis en skoonheid in alles rondom ons. Ons kan nie 'n wêreld sonder kunstenaars voorstel nie. Tweedens, ons is miljarde mense in die wêreld, en ons almal dink heeltemal anders van mekaar. Ons vind vreugde en geluk in verskillende goed; sommige lees, sommige maak musiek, sommige in elektriese drade, sommige in wetenskap, sommige in dans, en sommige soos ek wat 'n passie vir kleure het en om dinge uit ons verbeelding te skep en dit die werklikheid in te bring.
9. Wat is jou definisie van 'n suksesvolle kunstenaar?
My definisie van 'n suksesvolle kunstenaar is 'n voltydse kunstenaar wat 'n bestaan uit kuns kan maak en dit met die wêreld kan deel.
10. Wat is jou droom kunsprojek?
My droom kunsprojek is om 'n kunsskool te hê waar ek met weeskinders en hawelose mense kan werk en hulle leer hoe om goed uit niks te skep en hoe om 'n inkomste daarvan te verdien. Kuns moet 'n vrye beroepskeuse vir enigiemand wees want nie almal van ons in hierdie wêreld is bedoel om dokters, prokureurs, verpleegsters, ensovoorts, te wees nie.
Ons stem heeltemal saam met Michelle en wens haar alle voorspoed vir die blink toekoms wat vir haar wink. Volg vir Michelle Isaak op Instagram: @miiart7
***
Die foto van Michelle en haar kunswerke is self verskaf. Besoek The Project Room se webwerf om haar mees onlangse projek te sien: https://www.theprojectroom.com.na/post/art-for-bank-windhoek.
Opmerkings
Plaas 'n opmerking