ǀGUROMÂ ǀAI'OB TAWEDEǁNĀXUS xu Valerie Dorothea Isaaks (30/03/2023)

ǀGUROMÂ ǀAI'OB TAWEDEǁNĀXUS

 Gaob Jacob Stephanus Goliath

(27/11/1944 - 10/03/2023)

Kai khoetse, Egipteb Gunis ǃhūba xu

Kananni daib tsî danib diba mûhe

ǃKhōǁôa tsî Moro ǃGâiǁgoas timî tawede

ǃNora hâse ǃKhūba ǃoabas ǁkhoaba tsâ

Tsîs Fraitax ǁgoasores ǁhaiba ǂkhā

Elob gā-asisib, ǃgâin tsî tsūn ǁaegu ǀgoras diba ūhâ

ǁNāxa ǃkhāǃāb hâ xū-i ǀgui-e ǂkhoaǃnâ

ǀGuipa da kom hâo ti ǂâi tsîn gurisan âb Namana ǃnaka ǃgôa

ǃKhais ǁîba ǃoaxase gere xananǂgao kai

Tsîb ǀâses timîsi ǀHai ǀKhauab ǀaoba ǀgam

Kaiseb go ǁaixa ǃkhaisats ǂan tide,

Xawets ǁgâiǂuisens âb ǃnâ ama ǀarasab asa nî ǂan

ǀGôan ǀkha ǀgôa tsî kain ǀkha kai khoeb

ǃKhâi, ǂgōǀau tsî ǁaeb ai ǀawemās a ǁîb di ǀgau

ǁNātikōse ǂkhamda ga xū kai ǃkhaisa ǂgao

tsî ǀapon ra sī ǀhaoǀhaohe ǃkhai-i tsîn ai sida ǀkha ǃhao.

ǀOasase tsoatsoasa xu Naman ǁâudība ǂkhâǃnâ

Mîs, dīb tsî sā tama is ǀkha.

Aetsēs ko...mâtikōse da nî ôan-ai?

Koma videoga ra ǃkhō autaba nî ǃnai

Nēn huka ǂkhamǃnâ khoen xa ǀgui nî dīhes ao.

Khoeb di khoes, aits’ma tātsē ǂkhaisiba ǁao-am tamas

Korodisi kuriga ǁîb xa goro ǁao-ambahes

Aits’ma xawe ǁîs ta ǀguri ǂkhai ǃkhaisa nî ǁao-am.

Xaweb kom ǃhūbaib di tsâba Elob ǂûba go kaibao

Mâti ta nētikōse nî tsâ kai tib go dîsens kōse

Tsî Jesub kh’mi Fraitaxǁgoa ǂgaibē bi.

ǂGīǂgōs ǁîba ǀaoba xu ǀgora tama

Xui-ao kha ǁîkha 40 kuriga ge ǀgorasa i ǁaes ǃaroma

Tawedegu, ǃkhōǁôagu ais ǁgas ǃaroma

Nē dīǃkhais ge Sâsasiba ǀKhauasa mā

Sâsa as ge ǀHaiǀkhauasa

Ama sâsa a.

ECS Skoli ge tsoatsoa,

tsî ǀhûga skola ǂganam kais ǂkhabas ǀkha

ǀūǃâ ǁîb khoexakhoeba mâinǃnâ hâse hā

“Namakha xuige a kha ǃhoa-ūgus” ai

ǁGoasi ǃgôasib ǃnâ ǂkhabagu

“Steve ǂganam nē skola” tib Apis, Gaob Isaacka mî

Ob “Hî-î John, ǂganam ta tide” ti ǃgôasib ǃnâ ra ǃeream

Tsî gu khoega danhe ǁēb ne namab dib xa tsî ra ǃkhomǃnoro

ǂÂiǁgaub ǃnâ ǀkharas, ǀkhauǁnâǀkhāgu tama

Nē ǀumis ǀkha da ǃgorohe

Tās ǀkhara ǂâiǀgaub tsî mûǂgāǀgauba

ǃGôasibats nî ūhâbana sora kai tsi.

ǂKhîb ǃnâ ǃgû re ǀHaiǀkhauas ǂnīsasitse

ǃGâise ǃgû re Namakhoeda ǂkhâǃnâhaitse

Ab Eloba ǀoms âtsa ǂhē re

Ab sâsa sâba mā tsi re.

    Compiled by Valerie Dorothea Isaaks on behalf of the Nama Annual Cultural Festival on 30 March 2023 for the state funeral of Gaob Stephanus Goliath on Saturday, 1 April, 2023, at Berseba, ||Kharas region, Namibia.