|gâtsib îra |gâsa khoe i ge ge. ||îb îb ge |oro pirirodi |guide ūhâ i ge. Mamasas ge !khūnin |urisa sarana gere ||ā. |gâtsib ge ||gaisi sorosa ge ūhâ i. ||îb !nubu !aos ais ge ||îb !gubu danasa ge ǂnôa i. Xabe ||îb di kausa ais !nâ ra ge ||îb di !gam!gamsa mûra ǂnôa gere gabasen. ||îb di khoexa!nâ ais ge kai !gâiǂgaoxasib ab xa gere !nuri. ||îb di !gari âib ge tare khoe!nôab a !khaisa gere mîba tsi.
!khai ||goagab ge |gâtsiba ||în di |oro pirirode nau khoen di ǂgui |goa||khāsib |kha ǂnau|hao tsî gere !ûi. !garob !nâb ge ǂora |gabi !nâus ai ǂnû tsî ||îb di |harexa |gabasa !gâb |khāb ||ga ǂnûi tsî ǂhaba ǂgāgu ai gere kō||nâ. ||nāti ǂnû tsîb ge !nani||aba !guitsūba ||khiri tsî gere ||nae'am. ||nātib ge |gâtsiba ǂgui |gôanab nî ūhâ tsēs xa ǂnôa gere ǂâi.
!api|ûna ūhâ kai baigu, |gamisa ||nâgu âigu, tsî kai !omdi â i kausa gūdi, tsî ǂkhanu|kha ||khaoran xa |oa hâ hara !nurudi tsînab ge ǂnôa gere mûnanai. ||îb kara ||nāti !khūo, o ra ge ||gûra nēra ra !gomma tsâ khami !gomma ga tsâ tama i hâ.
ǂgui !nadi kōse, nē ||habode xub gere !huriǂkhaio, on ge |gôana |nai sī !am !hanagu !nâ gere ǂgâ. ||nā ||aeb aib ge ||na !nubu |nūrora âb |kha ||khāb as kōse !garise gere !khoe, xabeb ge ob gere !onkhao o gere !onkhao, tsî ||nā!oe !nabagu !nâ gere !ae.
***
J. Boois (1979)
Opmerkings
Plaas 'n opmerking