Gasdosent aan die Universiteit van Namibië (UNAM), Meidad Ovadia van die Hebreeuse Universiteit van Jerusalem in Israel, het verlede Woensdag, 26 Februarie, 2025, 'n digitale woordeboek, LexiKhoe, in Windhoek bekendgestel.
“Die hele gemeenskap kan hierby baat en ook bydra om dit 'n wonderlike woordeboek te maak,” het Ovadia by die bekendstelling gesê. “Ek dink oor 'n jaar van nou af, sal LexiKhoe uit duisende woorde bestaan, en selfs meer.”
Die idee om 'n digitale Khoekhoegowab woordeboek te skep het by hom opgekom nadat hy by 'n navorsingsgroep aangesluit het, en ontdek het dat Khoekhoegowab geen aanlyn of digitale hulpbronne het nie. Hy het vinnig besef dat aanvraag en behoefte vir so 'n woordeboek bestaan, asook 'n bron wat meer toeganklik is vir die Khoekhoegowab-sprekende gemeenskap en die publiek.
“En dit is hoekom ek besluit het om 'n digitale woordeboek vir Khoekhoegowab te skep. Ek is 'n sagteware-ingenieur en as ek iets sien wat ek self kan doen en oplos deur 'n tegnologiese oplossing daarvoor te skep, is ek opgewonde om dit te kan doen,” het Ovadia bygevoeg.
Hy het genoem dat LexiKhoe menigte bydraers tot die woordeboek se inhoud sal hê omdat dit ontwerp en opgestel is sodat enige gebruiker bydraes en inskrywings tot die woordeboek kan maak. Hy het ook gesê slegs tyd sal leer of die digitale woordeboek suksesvol sal wees of nie, maar hy glo dit sal gewild wees en ander taalgemeenskappe inspireer.
“Ons moet ook in ag neem dat alhoewel gedrukte woordeboeke steeds belangrik is, ontwikkel en verander taal gedurig. 'n Nuwe woordeboek kan nie elke dag gedruk word nie, terwyl 'n digitale woordeboek soos LexiKhoe enige tyd op datum gebring kan word.”
Ten slotte het Meidad Ovadia gesê dat 'n dinamiese digitale woordeboek 'n meer effektiewe manier is om Khoekhoegowab te dokumenteer en te bewaar.
Om 'n bydrae in die vorm van woorde en hul betekenis tot hierdie opwindende projek te maak, hier is die skakel na LexiKhoe: https://lexikhoe.com/index.html .
Dit is opgestel om tussen die Ingels en Khoekhoegowab te wissel wat beteken woorde kan in beide tale gesoek word deur slegs op die wisselaar KKG-ENG of ENG-KKG te klik en te kies. Klik op die plusteken (+) om 'n nuwe woord in Khoekhoegowab tot die digitale woordeboek by te voeg. Bydraers tot die woordeboek mag anoniem of onbekend bly, óf kan bydraes onder hul eie name of noemname maak.
Nossob Xoa Xrup is van mening dat Meidad Ovadia s'n 'n uitstekende idee is en beslis 'n wen is vir bedreigde inheemse tale soos Khoekhoegowab. Kom ons maak van LexiKhoe 'n sukses!
***
Lees ook hier in die Ingels:
1. Khoekhoegowab goes Digital, Rudolf Gaiseb, New Era: https://neweralive.na/khoekhoegowab-goes-digital/
2. Khoekhoegowab Digital Dictionary Launched, Fenny Hiveluah, The Namibian: https://www.namibian.com.na/khoekhoegowab-digital-dictionary-launched/
3. Die foto van Meidad Ovadia by die bekendstelling van LexiKhoe is deur Rudolf Gaiseb vir New Era geneem.
Opmerkings
Plaas 'n opmerking